நூலகர் செய்திமடல் 20

 ஆசிரியர் உரை:

வணக்கம்,

மாவட்டந்தோறும் புத்தகத் திருவிழாக்கள் நடத்துவதற்கான அரசாணை வெளிவந்துவிட்டது. இதனைத் தொடர்ந்து முதல் மாவட்டமாக தருமபுரி மாவட்டம் புத்தகத் திருவிழாவை நடத்துகிறது. புத்தகத் திருவிழாவுக்கான நிதி பொது நூலகத்துறை மூலம் வழங்கப்படுவதால், புத்தகத் திருவிழாக்களில் நூலகத் துறையின் பங்களிப்பு அதிக அளவில் இருக்க வேண்டும் என்று நான் தொடர்ந்து வலியுறுத்தி வருகிறேன். அந்த வகையில் தருமபுரி மாவட்ட நூலக துறையும் தருமபுரி புத்தகத் திருவிழாவில் அதிக அளவில் ஈடுபட வேண்டும் என்று கூறிவந்தேன். அதற்கான முன்மொழிவுகளையும் ஏற்பாடுகளையும் செய்து கொடுத்தேன். தருமபுரி புத்தகத் திருவிழாவில் நூலகத் துறைக்கு என்று தனியாக அரங்கு ஒதுக்க வேண்டும் என்று விழாக் குழுவினரிடம் நான் கேட்டுக் கொண்டதன் பெயரில் அரக்கு ஒதுக்கப்பட்டது. அதில் நூலகங்களில் செயல்பாடுகள், நூலகங்களின் எண்ணிக்கை விவரிக்கப்பட்டது. மெய்நிகர் கருவியும் காட்சிப்படுத்தப்பட்டது. புத்தகத் திருவிழா பணிக்கு நூலகர்கள் 10 பேர் 11 நாட்கள்  நியமிக்கப்பட்டனர். இது மட்டுமல்லாது, தினமும் சுழற்சி அடிப்படையில் பத்து நூலகர்கள்  பணியமர்த்தப்பட்டனர். இதன் மூலம் புத்தகக் கண்காட்சிக்கு வர வாய்ப்பு இல்லாத நூலகர்களும் புத்தகத் திருவிழாவை காண முடிந்தது. புத்தகத் திருவிழாவில் நூல் விற்பனை விவரம், இலக்கிய நிகழ்ச்சிகள், கலை நிகழ்ச்சிகள், விழாவிற்கு வரும் பள்ளிகளின் எண்ணிக்கை, மாணவர்களின் எண்ணிக்கை போன்ற புள்ளி விவரங்களை திரட்டும் பணிகளை நூலகர்கள் மேற்கொண்டனர்.  இந்த பணிகளை நூலகர்கள் சிறப்பாக செய்தனர்.  

இவ்வாறு நூலகத்துறை சிறப்பாக செய்து இருந்தாலும், சில குறைகளை சுட்டிக்காட்ட வேண்டியது அவசியம். ஏனென்றால்,  மற்ற மாவட்டங்களில் நடைபெறும் புத்தகத் திருவிழாக்கள் தர்மபுரி புத்தகத் திருவிழா ஒரு முன்னோடியாக இருக்க வேண்டும் என்பதற்காக சுட்டிக்காட்டுகிறேன்.  நூலக அரங்கில் விழாவிற்கு வரும் வாசகர்களுக்கு துறையின் நோக்கம், செயல்பாடுகள், மாநில அளவில் உள்ள நூலகங்கள் எண்ணிக்கை, நூலகத்துறையின் சிறப்பு திட்டங்கள் அடங்கிய கையேடு பத்தாயிரம் பிரதி அச்சடித்து வருபவர்களுக்கு கொடுக்கலாம் என்று ஆலோசனை வழங்கினேன். அந்த கையேடும் தட்டச்சு செய்து ஒழுங்குப்படுத்தி மாவட்ட நூலக அலுவலரிடம் கொடுத்தேன். அச்சு செலவுக்கான தொகையை விழாக் குழு ஏற்றுக் கொள்வதாகவும் கூறினார்கள். இது என்னுடைய ஏற்பாடு என்பதால் அதை அவர்கள் செய்யவில்லை.

 அடுத்து, 'தருமபுரி வாசிக்கிறது' என்னும் ஒரு நிகழ்ச்சியை செப்டம்பர் 5ஆம் தேதி மாவட்டத்தில் உள்ள அனைத்து பள்ளி, கல்லூரி மாணவர்கள் ஒரே நேரத்தில் அமர்ந்து பாடப் புத்தகங்களுக்கு அப்பாற்பட்ட புத்தகத்தை வாசிப்பது என்று விழாக் குழு முடிவு செய்தது.  அந்த நிகழ்ச்சி சிறப்பாக நடைபெற்றது. மாவட்ட ஆட்சியர், புத்தகத் திருவிழாக் குழுவினர் அளே  தருமபுரி அரசு மேல்நிலைப் பள்ளியில் நடைபெற்ற 'தருமபுரி வாசிக்கிறது' நிகழ்ச்சியில் கலந்து கொண்டனர். இதில் வருத்தமான செய்தி என்னவென்றால் இந்த நிகழ்ச்சியில் மாவட்ட நூலக அலுவலர் கலந்து கொள்ளவில்லை. மேலும், மாவட்ட நூலக அலுவலர் நூலகர்களை  இந்த 'தருமபுரி வாசிக்கிறது' நிகழ்ச்சியில்  ஈடுபடுத்தப்படவில்லை. மாவட்ட நூலக அலுவலரும் எந்த பள்ளியிலும் கலந்து கொள்ளவில்லை. எந்த நூலகரும்  அருகாமையில் இருக்கும் பள்ளியில் நடைபெற்ற நிகழ்ச்சியில் கலந்து கொள்ளவில்லை.  'தருமபுரி வாசிக்கிறது' நிகழ்ச்சி சிறப்பாக அமைய நூலகர்கள்  அந்தந்தப் பகுதியில் இருக்கின்ற பள்ளிகளில் நூலகப் புத்தகங்களை வழங்கி வாசிக்க வைக்கலாம்' என்று  மாவட்ட நூலக அலுவலர் தலைமையில் நடைபெற்ற விழாக் குழுவில் நான் கூறினேன். இந்த யோசனையை நான் முன்மொழிந்தேன் என்பதற்காக இவ்வளவு சிறப்பு வாய்ந்த நிகழ்ச்சியை நூலகத்துறை புறக்கணித்தது மிகவும் வருத்தம் அளிக்கிறது.  

மாவட்ட ஆட்சியர் வடிவமைத்த அழைப்பிதழில் பகல் நேர நிகழ்ச்சி ஒருங்கிணைப்பாளர் என்று என் பெயர் உள்ளது. ஆனால், மாவட்ட நூலக அலுவலர் எனக்கு ஒரு நாள் மட்டும் புத்தகத் திருவிழா பணி வழங்கி இருக்கிறார்.

 அதுவும் கடைசி ஒரு நாள் மட்டும். கேட்டதற்கு நிகழ்ச்சி ஒருங்கிணைப்பாளர் என்று நான் நியமித்தேனா? என்றார். அதற்கு மேல் என்னால் எதுவும் பேச முடியவில்லை. விடுப்பு எடுத்துக் கொண்டு விழா நிகழ்ச்சிகளை ஒருங்கிணைக்கும் பணி செய்து வருகிறேன்.

இனி வரும் காலங்களில் சங்கப் பாகுபாடு, தனிநபர்  வெறுப்புக்கு ஆளாகாமல் மாவட்ட நூலக அலுவலர்கள் அரசு விழாக்களை சிறப்பாக நடத்தி நற்பெயர் பெற முயற்சி செய்ய வேண்டும்.

 அடுத்ததாக, ஊர்ப்புற நூலகர்கள் தங்களுக்கு முறையான காலமுறை ஊதியம் வழங்க வேண்டும் என்று உண்ணாவிரதம் இருந்தனர். இந்த ஆட்சியாளர்கள் கொடுத்த தேர்தல் வாக்குறுதியை நிறைவேற்ற வேண்டும் என்று வலியுறுத்தி வருகின்றனர்.

அதைத்தான் நாமும் தொடர்ந்து வலியுறுத்தி வருகிறோம்.  ஊர்ப்புற நூலகர் பணியிடம் பகுதிநேர பணியிடம். இந்த பணியிடத்தை முழு நேர பணியிடமாக அறிவித்து, முறையான காலமுறை ஊதியம் வழங்க வேண்டும். இரண்டு நேரம் வேலை வாங்கிக் கொண்டு பகுதி நேர பணியாளர் என்று அறிவிப்பது ஏற்புடையதல்ல. ஊர்ப்புற நூலகர்கள் இதை புரிந்து கொள்ள வேண்டும். தாங்கள் முழு நேர பணியாளர்கள் என்று பலரும் நினைத்துக் கொண்டிருக்கிறார்கள். இரண்டு வேலை வேலை செய்தால் முழு நேர பணியாளர் என்று பொருள் ஆகாது. அரசாணையில் என்ன சொல்லப்பட்டுள்ளது என்று பார்க்க வேண்டும்.  தங்களை முழு நேர பணியாளர்களாக அறிவிக்க வேண்டும் என்று ஊர்ப்புற நூலகர்கள் கோரிக்கை வைக்க வேண்டும்.  அப்பொழுதுதான் நீதிமன்றம் சென்றாலும் வெற்றி அடைய முடியும்.  நன்றி. மீண்டும் சந்திப்போம்.

- சி. சரவணன்.

பொது நூலகத்துறை துணை இயக்குநர் திரு இளங்கோ சந்திர குமார் அவர்களின் இல்லத் திருமண விழாவில் மணமக்களை வாழ்த்தும்  பொது நூலகத்துறை இயக்குநர் திரு க.இளம்பகவத் அவர்கள். தருமபுரி புத்தகத் திருவிழா செய்திகள்:

புத்தகத் திருவிழாவில் புத்தகங்கள் வாங்கிய மாணவர்கள்... (மேலே)

தருமபுரி புத்தகத் திருவிழாவில் சிறப்புரையாற்ற வந்த கவிஞர் நந்தலாலா அவர்களுக்கு  மாவட்ட நூலக அலுவலர் (பொ) திருமதி டி. மாதேஸ்வரி  நினைவுப் பரிசு வழங்கியபோது. 

புத்தகத் திருவிழாவில் படைப்பாளர்கள் கலந்துரையாடல் 

புத்தகத் திருவிழாவில் கவியரங்கம் 

தருமபுரி புத்தகத் திருவிழாவில்  மாவட்ட படைப்பாளர் பதிப்பாளர் சங்கம் அரங்கில் புத்தகங்கள் வாங்கும் கடத்தூர் கிரீன் பார்க் பள்ளி நிறுவனர் திரு. முனிரத்தினம்.

வ உ சி 152 ஆவது பிறந்தநாள் விழா:

        தென்காசி மாவட்ட மைய நூலகமாக தரம் உயர்ந்துள்ள  வ உ சி  வட்டார நூலகமும் ரோட்டரி கிளப் குற்றாலம் சக்தி இணைந்து  வ உ சிதம்பரனாரின் 152 ஆவது பிறந்தநாள் விழாவினை பள்ளி மாணவர்களுக்கு  ஓவியப்போட்டி கட்டுரை போட்டி பேச்சுப்போட்டி என  நடத்தி  பரிசளிப்பு விழா   ரோட்டரி கிளப் குற்றாலம் சக்தி தலைவர் திருமதி அனிதா ஆனந்த்    தலைமையில்  நடைபெற்றது. செயலாளர் கல்யாணி முன்னிலை வைத்தார்

     வட்டார நூலகர் பிரம  நாயகம் வரவேற்புரை ஆற்றினார் விழாவில் வட்டார கல்வி அலுவலர் இளமுருகன் பணி நிறைவு  தலைமை ஆசிரியர்  போட்டி ஒருங்கிணைப்பாளர் ஆறுமுகம் ரோட்டரி கிளப் குற்றாலம் சக்தி பொறுப்பாளர்கள்  திருமதி. பொன்னி, முனைவர் பத்மா ராஜ், சிவராஜம், ராதாகிருஷ்ணம்மாள்  நசீஹா ரகுமான் சுபேதார் கிருஷ்ணன் ஆர்வலர் லட்சுமி  உள்ளிட்டோர் கலந்து கொண்டனர் கிளை நூலகர் சுந்தர் நன்றி தெரிவித்தார். 

    ஓவிய போட்டியில் தென்காசி ஏழாவது வார்டு நகராட்சி பள்ளி ஸமீஹா முதல் பரிசு புல்லுக்காட்டு வலசை ஊராட்சி ஒன்றிய தொடக்கப்பள்ளி ராகவேந்திரா சுரண்டை கிரியேட்டிவ் ஸ்கூல்  பரிநிதா செல்லா   இரண்டாம் பரிசு தென்காசி பொன்னம்பலம்  நடுநிலைப்பள்ளி மோகன் காட்டுபாவா நடுநிலைப்பள்ளி ஷர்மிளா பானு மூன்றாம் பரிசு பெற்றனர். 

    கட்டுரை போட்டியில் நெடுவயல் சிவசைல நாத பள்ளி ஜோதி தமிழ் வழியில் தென்காசி இசக்கி வித்தியாஷரம் பள்ளி தேவ் தர்ஷன் ஆங்கில வழியில்  முதல் பரிசு பெற்றனர். தென்காசி ஆக்ஸ்போர்டு பள்ளி அமிர்தவர்ஷினி நெடுவயல் சிவசைலநாத பள்ளி  இம்ரானா இரண்டாம் பரிசும் டிடிடிஏ நடுநிலைப்பள்ளி அபிஷா தென்காசி ஏழாவது வார்டு நகராட்சி நடுநிலைப்பள்ளி சுடலை ராஜா மூன்றாம் பரிசு பெற்றனர். 

    பேச்சு போட்டியில் குற்றாலம் செய்யது மேல்நிலைப்பள்ளி அட்சயா முதல் பரிசும் செங்கோட்டை எஸ் எம் எஸ் எஸ் அரசு ஆண்கள் மேல்நிலைப்பள்ளி முகமது சிராஜுதீன் இரண்டாம் பரிசும் பெற்றனர்.

    வாசிப்பு பழக்கத்தினை ஊக்கு விக்கும் விதமாக போட்டிகளில் கலந்து கொண்ட 142 மாணவச் செல்வங்கள், பிரமுகர்கள், வாசகர்கள் என அனைவருக்கும் புத்தகங்கள் பரிசாக வழங்கப்பட்டது. விழாவில் வ.உ.சி.யின் புத்தகங்கள் கண்காட்சிக்கு வைக்கப்பட்டிருந்தன. விழாவினை நூலகர்கள் ஜூலியாராஜ செல்வி நிஹ்மதுனிஸா வாசகர்வட்ட நிர்வாகிகள் சலீம் முகம்மது மீரான் குழந்தைஜேசு முருகேசன் செய்திருந்தனர்.

Erode Digital library Erode  &  Power IAS Academy இணைந்து நடத்திய புத்தகமறிவோம் நிகழ்ச்சியில் உங்களின் ஆசைகளை குறிக்கோள்களை மனதில் காட்சிப்படுத்துதல் மூலம் நிறைவேற்றிக் கொள்வது எப்படி என்பதை ராஜேஸ்வரி trainer எடுத்துரைத்தார்.

02.09.23 --- PG PUNCH GURUKULAM - Erode Chapter "உறவுகள் சிறகுகள்" Resource person PG K.R.Ashok.

திருமதி. M. புஷ்பா முருகன். ஊராட்சி மன்ற உறுப்பினர் அவர்கள் திருநாவலூர் கிளை நூலகர். ஆ. சசிகுமார் அவர்களிடம் ரூபாய் ஆயிரம் செலுத்தி புரவலராக சேர்ந்து கொண்டபோது.

          கடலூர் மாவட்டம் விருத்தாச்சலம்  முழுநேர கிளை நூலகத்திற்கு (13/09/2023)  போட்டித்தேர்வு மாணவ மாணவிகளின் கோரிக்கையினை ஏற்று விருத்தாச்சலம்  கொளஞ்சியப்பர் அரசு கலைக்கல்லூரின் மேனாள் நூலகர் திரு. மாணிக்கசிவசாமி அவர்களை அனுகி சுமார் ரூபாய் 7000 மதிப்பு கொண்ட தரமான 10 நெகிழி நாற்காலி (plastics chairs)  நன்கொடையாக பெறப்பட்டது. 

    நன்கொடை வழங்கிய மேனாள் கலைக் கல்லூரி நூலகர் திரு மாணிக்கசிவசாமி அவர்களுக்கு தீவிரமாக முயற்சி செய்து எங்களின் நீண்ட நாள் கோரிக்கையினை நிறைவு செய்த இரண்டாம் நிலை நூலகர் திரு. இரா. கொளஞ்சிநாதன் அவர்களுக்கும் முழு முயற்சியில் தன்னை ஈடுபடுத்தி விரைவில் கிடைக்க ஆவண செய்த. மூன்றாம் நிலை நூலகர் கு.பவித்ரா  அவர்களுக்கும் போட்டி தேர்வு மாணவ மாணவிகளின் சார்பில்  வாழ்த்துகளையும் பராட்டுகளையும் தெரிவித்துக் கொள்கிறோம்.

  - போட்டித் தேர்வு மாணவர்கள் அ.ஆனந்தன், ஆர்.சூர்யா,  எம்.சதீஸ்,  வி.வசந்த்,  எஸ்.விஜய்,  பி.பாலமுருகன், பி.ஆனந்தவள்ளி

   செங்கோட்டை நூலகத்தில்  வீர நல்லூரை சேர்ந்த கவிஞர் எழுத்தாளர் பட்டிமன்ற நடுவருமான வீரைமைதீன்  அவர்கள் ரூபாய் 1000 செலுத்தி 257 -வது புரவலராக தன்னை இணைத்துக் கொண்டதோடு "கலைஞர் கவிஞர் 100" என்ற நூலையும் அன்பளிப்பாக நூலகத்திற்கு வழங்கினார்.

இன்று 03/09/2023 சென்னை, ஆழ்வார்பேட்டை, வட்டார  நூலகத்தில் மாணவர்களுக்கு அடிப்படை கணினி பயிற்சி மற்றும் மெய்நிகர் பயிற்சி வழங்கப்பட்டது. கணினி பயிற்சி வழங்கியவர்கள் எ. கௌசர் மற்றும் கெ. கோமதி அவர்கள். மெய்நிகர் பயிற்சியை வழங்கியவர் நூலகர் இரா.கலைமணி அவர்கள்.

 நூலகர்கள் தங்கள் நூலகங்களில் நடைபெறும் நிகழ்ச்சிகள் பற்றிய  செய்திகள்,  கவிதை, சிறுகதை, கட்டுரை, நகைச்சுவை, துணுக்கு செய்திகள் போன்ற படைப்புக்களையும் எழுதி அனுப்பலாம். 

மின்னஞ்சல்:  noolagarseithi@gmail.com

வாட்ஸ் ஆப் :  8668192839.

இந்த இதழ் பற்றிய தங்கள் கருத்துகளை கீழே உள்ள பெட்டியில் பதிவு செய்யுமாறு அன்புடன் கேட்டுக் கொள்கிறேன். நன்றி வணக்கம்.