நூலகர் செய்திமடல் 33

 ஆசிரியர் உரை: 

அனைவருக்கும் வணக்கம்,

இணைய வழியில் நாம் தேர்ந்தெடுத்த பருவ இதழ்கள் அஞ்சல் வழியில் வரத் தொடங்கி விட்டன. இத்தனை ஆண்டுகள் யாரோ தேர்வு செய்த பத்திரிகைகள் நம் நூலகங்களுக்கு வந்தன. ஆனால், இந்த ஆண்டு நம் நூலகத்திற்கான பருவ இதழ்களை நாமே தேர்வு செய்து, பெறுவது மகிழ்ச்சி அளிக்கிறது. இந்த இதழ்கள் ‘வாசகர் விருப்பம் அறிந்து’ என்று சொல்லப்பட்டாலும், ‘நூலகர் விருப்பம் அறிந்தும்’ என்று சொல்லலாம்.

 ஏனென்றால், நூலகர் என்பவர் முதல் வாசகர். நூலகர் என்பவர் வாசகர்களின் பிரதிநிதியும்கூட. நான் சந்தா செலுத்தி சில பத்திரிகைகள் வாங்கி படித்து, வாசகர்களுக்கும் கொடுத்து வந்தேன். அந்த பத்திரிகைகள் தற்பொழுது இணைய வழியில் தேர்வு செய்யப்பட்டுள்ளன.

 ஒரு வாசகரும் படிக்கப்படாத பருவ இதழ்கள் நூலகத்திற்கு வந்த நிலையும் இருந்தது. ஆனால், இன்று அப்படி இல்லை. 'ஒரு வாசகருக்கு ஒரு பத்திரிக்கை; ஒரு பத்திரிக்கைக்கு ஒரு வாசகர் என்னும் குறைந்தபட்ச பயன்பாட்டிலாவது பருவ இதழ்கள் இருக்க வேண்டும்' என்கின்ற உயரிய எண்ணத்தில்தான் பருவ இதழ்கள் இணைய வழியில் நூலகர்கள் மூலம் தேர்வு செய்யப்பட்டுள்ளன.

மேலும், பருவ இதழ்களுக்கு ஆண்டு சந்தா செலுத்துவதன் மூலம் அவைகளுக்கு வழங்கப்படும் தொகையும் குறைகிறது. நூலகத் துறையில் மேற்கொள்ளப்பட்டு வரும் சீர்திருத்தங்களில் இது ஒரு முக்கியமான ஒன்று என்று நான் நினைக்கிறேன்.

 இதேபோல், நூலகங்களுக்கு வாங்கப்படும் செய்தித்தாள்கள் பற்றி முடிவு செய்யும்போது, மாவட்ட நூலக அலுவலர்கள் நூலகர்களிடம் கலந்து பேசுவது நல்லது. ஏனென்றால், நூலகம் அமைந்துள்ள பகுதியில் கிடைக்கும் பத்திரிகைகளுக்குப் பதில், கிடைக்கப்பெறாத செய்தித்தாள்கள் சில இடங்களில் வாங்க அனுமதி அளிக்கப்படுகிறது. குறிப்பாக, தமிழ் முரசு, மாலை முரசு ஆகிய மாலை செய்தித்தாள்கள் பல நூலகங்களுக்கு அனுமதி அளிக்கப்பட்டுள்ளன. ஆனால், இந்த செய்தித்தாள்களுக்குப் பல இடங்களில் முகவர்கள் இல்லை. இந்த செய்தித்தாள்களுக்குப் பதில் பரவலாக எல்லா இடங்களிலும் கிடைக்கும் மாலை மலர் பத்திரிகையை மாற்றிக் கொடுக்க மாவட்ட நூலக அலுவலர்கள் முன்வர வேண்டும்.

அடுத்து, மே 23  உலக புத்தக தினம். அண்ணா நூற்றாண்டு நூலகம் உள்ளிட்ட பல நூலகங்களில் உலக புத்தக தினம் சிறப்பாகக் கொண்டாடப்பட்டதாக செய்திகள் வந்துள்ளன. அனைத்து நூலகங்களிலும் இதுபோன்று ஏதாவது ஒரு நிகழ்ச்சி நடத்த மாவட்ட நூலக அலுவலர்கள் நூலகர்களுக்கு அறிவுரை வழங்க வேண்டும். அத்துடன் குறைந்தபட்ச செலவுக்கான நிதியை வழங்குவது அவசியம்.

நூலகங்களின் செயல்பாடுகளை பொதுமக்கள் தெரிந்து கொள்ள இதுபோன்ற விழாக்களை நடத்துவது அவசியம். வர்த்தக நிறுவனங்கள் தங்கள் பொருள்களை விளம்பரப்படுத்தி வருகின்றன. நாமும் நம் பொருட்களை விளம்பரப்படுத்துவது (Marketing Knowledge)  அவசியம். அப்பொழுதுதான் நூலக பயன்பாடு அதிகரிக்கும்.

உலக புத்தக தினத்தை முன்னிட்டு, அகில இந்திய வானொலி தருமபுரி பண்பலை வழக்கம்போல் என்னை அழைத்து, ‘வாசிப்பை நேசிப்போம்’ என்னும் தலைப்பில் ஒரு மணிநேர நேரலை நிகழ்ச்சி நடத்தியது. வானொலி நிலையம் ஒவ்வொரு நிகழ்ச்சிக்கும் ரூ. 2,500 வழங்குகிறது என்பது குறிப்பிடத்தக்கது. மாவட்ட நூலக அலுவலர்கள் / நூலகர்கள் இது போன்ற வாய்ப்புகளை பயன்படுத்திக் கொள்வது நல்லது. நமக்கு வருமானமும் கிடைக்கிறது. விளம்பரமும் கிடைக்கிறது. ஒரு மணி நேரத்தில் லட்சக் கணக்கானோருக்கு அறிமுகமானவராக ஆகிவிடுகிறோம்.

அடுத்து, எதிர்வரும் மே 22 பொது நூலக தினம். அன்று அனைத்து நூலகங்களிலும் ஏதாவது விழாக்கள் நடத்த  நாம் முயற்சி செய்வோம்.

நன்றி. மீண்டும் சந்திப்போம்.  

• சி.சரவணன், ஆசிரியர், 
  நூலகர் செய்திமடல்,
• 8668192839.

------------------------------------------------

23.04.2024 செவ்வாய்க் கிழமை உலக புத்தக தினத்தை முன்னிட்டு அகில இந்திய வானொலி தருமபுரி பண்பலையில் வாசிப்பை நேசிப்போம் என்னும் தலைப்பில் நடைபெற்ற நேரலை நிகழ்ச்சியில் கலந்து கொண்ட போது.

Transmission Officer திரு. கோபாலகிருஷ்ணன் அவர்களுக்கு நான் எழுதிய இந்தியாவில் நூலக வளர்ச்சி என்னும் நூலை நினைவுப் பரிசாக வழங்கிய பொது. 

முழு நேர கிளை நூலகம் நெல் வயல் சாலை பெரம்பூர் சென்னை 11. அரசு பொது தேர்வுக்கு படித்து வந்த மாணவர் திரு. பொ. துரைராஜ் அவர்கள்  2023 TNPSC தேர்வில் வெற்றி பெற்று ஊரக வளர்ச்சித் துறை திருவள்ளூர் மாவட்டத்தில் பணிக்கான ஆணை வழங்கப்பட்டுள்ளது.  அவருக்கு  நூலகத்தின் சார்பாகவும் தமிழ்நாடு பொது நூலகத்துறை சார்பாகவும் வாழ்த்துக்களை தெரிவித்துக் கொள்கிறோம்.

- என். செல்வம், இரண்டாம் நிலை நூலகர்.

உலக புத்தக தினம் 

கவிதை எழுதியவர்: தேவ சுந்தர், நூலகர்,

அசோக் நகர் (புதூர்), சென்னை-83.

புத்கத்துக்குள் உலகம்

புத்தகத்துக்குள் நம்நாடு

புத்தகத்துக்குள் ஆன்மீகம்

புத்தகத்துக்கு ள்

அரசியல்

புத்தகத்துக்குள்

இலக்கியம்

புத்தகத்துக்குள்

மருத்துவம்

புத்தகத்துக்குள்

கணிணி

புத்தகத்துக்கு ள்

இணையதளம்

புத்தகத்துக்குள் செல்

வாழ் வாய்.

17-04-24 அன்று தருமபுரி மாவட்டம் இண்டூர் கிளை நூலகத்தில் ஈ.சக்திசங்கர்  ரூ.1000/- மற்றும் ஈ.பிரணவ் ரூ.1000/- செலுத்தி புரவலர்களாக  இணைந்து கொண்டனர்.  அவர்களுக்கு நூலகத்தின் சார்பாக நன்றியையும் பாராட்டுக்களையும் தெரிவிக்கப்பட்டது. 

(24.04.2024) இருமத்தூர் ஊர்ப்புற நூலகத்தில் திரு.  I. K. முருகன் ரூ. 1000./- செலுத்தி புரவலராக இருமத்தூர் ஊர்ப்புற நூலகத்தில்

இணைந்து கொண்டார்.  அவருக்கு நூலகத்தின் சார்பாக நன்றியும் பாராட்டுக்களும் தெரிவித்துக்கப்பட்டது. 

- செ. மாதவன், ஊர்ப்புற நூலகர், இருமத்தூர்.

உலக புத்தக தினத்தை முன்னிட்டு  23/04/2024 அன்று பாம்பன் அரசு கிளை நூலகத்தில் வாசகர் வட்டம் சார்பாக புத்தக கண்காட்சி வாசகர் வட்டத்  தலைவர் முத்துவாப்பா தலைமையில் நடைபெற்றது. வாசகர் வட்டத் துணைத் தலைவர் இராமு வரவேற்றார், வாசகர் வட்ட மூத்த ஆலோசகர் முனைவர் முத்து வாசிப்பின் அவசியம் குறித்து பேசி புத்தக கண்காட்சியினை ரிப்பன் வெட்டி திறந்து வைத்தார், இந்த நிகழ்ச்சியில்  வாசகர் வட்ட ஒருங்கிணைப்பாளர்கள் ராமசாமி, தினேஷ் மற்றும்   வாசகர்கள் திரளாக  கலந்து கொண்டனர். நிகழ்சிக்கான ஏற்பாடுகளை பாம்பன் நூலகர் ரிஸாலத்அலி செய்து நன்றி கூறினார்.

பொது நூலகத்துறையின்  கீழ் இயங்கும், ,திண்டுக்கல்  மாவட்ட  நூலக ஆணைக்குழுவில்  உள்ள கோபால்பட்டி கிளை நூலகத்திற்கு  ரூ.10,000 மதிப்புள்ள 4  இரும்பு புத்தக அடுக்குகள்,  திரு. S. செளந்தரராஜன் (விமான படை  வீரர்)வழங்கினார். அவரக்கு  நன்றியும், வாழ்த்துகளையும்  பொது நூலகத்துறை  சார்பாக தெரிவித்துக் கொள்கிறோம்.        

            

- சா.கனகராஜ், நூலகர், 

கிளை நூலகம்,  கோபால்பட்டி

சிறுவர் இதழ்கள் வாசிப்போமா?

மா.கோவிந்தசாமி

வணக்கம் மாணவர்களே!

நலம் தானே? கோடை விடுமுறையில் குதூகலமாக .கூடி விளையாடி மகிழுந்துக்கொண்டிருக்கிறீர்கள் மகிழ்ச்சி. 

அது சரி...

கடந்தமுறை நூலகம் செல்ல சொல்லியிருந்தேனே சென்றீர்களா?

ஆம் என்று சொல்கிறீர்கள். 

எல்லா நூலகத்திலும் கோடை கொண்டாட்டம் நிகழ்ச்சி நடத்த தொடங்கிவிட்டார்கள் நூலகம் செல்லுங்கள்.

உங்களை போல சிறுவர்களாக இருந்தபோது நூலகத்தில் அம்புலிமாமா, அணில், டமாரம், பூந்தளிர், கோகுலம் போன்ற சிறுவர் இதழ்கள் வெகு பிரபலமாக இருந்தது. உங்கள் அப்பாவிடம் கேளுங்கள். அதையெல்லாம் படித்து மகிழ்ந்திருப்பார்கள். போட்டிபோட்டுக்கொண்டு படிப்பார்கள். அண்மையில் கூட சுட்டி விகடன் தும்பி போன்றவை வந்து நின்றுவிட்டன.

நீங்களேபள்ளியில் ஊஞ்சல் படித்திருக்கிறீர்கள் தானே.

இப்போதும்கூட நாளிதழ்களில் இணைப்பாக உங்களுக்காக சிறுவர் பக்கங்கள் வருகின்றன.

தினமணியில் சிறுவர்மணி, தினத்தந்தியில் தங்கமலர், தினமலரில் பட்டம், சிறுவர்மலர், தமிழ் இந்துவில் மாயா பஜார். போன்றவை - இணைப்புகளாக வந்துக்கொண்டிருக்கின்றன. நூலகம் சென்று பாருங்களேன் அப்புறம் பாருங்கள் உங்கள் வாழ்க்கையே வண்ணமயமாகிவிடும்.

இதுமட்டுமா?

உங்களுக்காக இப்போதும் சிறுவர்புத்தகங்கள் வருகின்றன

துளிர் அறிவியல்மாத இதழ், சுட்டியானை மாத இதழ்,  குட்டி ஆகாயம், பஞ்சுமிட்டாய் போன்றவற்றை அப்பாவிடம் சொல்லி வாங்கிக்கொள்ளுங்கள் நூலகத்தில் சிறுவர்களுக்காக எழுதப்பட்ட ஆயிரக்கணக்கான புத்தகங்கள் உள்ளன. இதையெல்லாம் இந்த கோடை விடுமுறையில் வாசிக்காமல் வேறு எப்போது வாசிப்பது.

 என்ன இப்போதே செல்ல தொடங்கிவிட்டீர்கள்.

சாப்பிட்டுவிட்டு செல்லுங்கள்.

நூலகத்திற்குள் சென்றால் வெளியே வர மனமே வராது.

அடுத்த முறை வேறு ஒரு தகவலுடன் உங்களை சந்திக்கிறேன்.

நன்றி.

கூத்தபடி மா.கோவிந்தசாமி, 

ஆசிரியர், தருமபுரி மாவட்டம்.

1.5.2024

சுகாதாரத் துறை எசரிக்கை: 

இன்று முதல் வரும் அடுத்தடுத்த நாட்களில் வெயிலின் தாக்கம்  110டிகிரி வரை  அதிகரிக்க வாய்ப்பு!!! 

வெயில் அதிகரிக்கும் போது ஆக்சிஜன் லெவல் மிகக் குறைவாக இருக்கும் எனவே மே மாதம் முடியும் வரை  மதியம் ஒரு மணி முதல் மாலை 5 மணி வரை 

பெரியவர்கள் முதல் சிறியவர்கள் வரை வெளியில் செல்வதை தவிர்க்கவும்.

 நோயாளிகள் கர்ப்பிணிகள் சற்று எச்சரிக்கையுடன் இருங்கள்.

ஐஸ் கட்டிகள், ஐஸ் வாட்டர்,  கார்பனேட் குளிர்பானங்கள் கண்டிப்பாக தவிர்க்கவும். பழச்சாறு அருந்தலாம் அதுவும் ஐஸ் போடாமல், மற்றும் இளநீர்... இது எல்லாவற்றையும் விட மிகச் சிறந்தது மோர். பாட்டிலில் எடுத்து செல்லுங்கள்.‌

 அனைவரும் காலையிருந்தே மோர் மற்றும் நீராகாரங்களை அடிக்கடி உட்கொள்ளுங்கள். 

காபி டீ இன்னும் ஒரு மாதத்திற்கு வேண்டாம். காலையில் சுடுநீரில் இஞ்சி போட்டு சாப்பிட்டு வர பித்தம் தணியும். 

முதலுதவி போல எலுமிச்சை எப்போதும் வீட்டில் இருக்கட்டும். 

மாமிச உணவு, அதிக எண்ணெய் மற்றும்  காரம் வேண்டாம்.

வெயிலில் இருந்து வந்தவுடன் சிறிது நேரம் சென்று வியர்வை தணிந்தவுடன் தண்ணீர் அருந்தவும். உடனே ஐஸ் வாட்டர் அருந்தினால் உயிருக்கு ஆபத்தை விளைவிக்கும். மூளையில் இருந்து வரும் நரம்புகள் ஒலியின் வேகத்தை விட அதிக ஆற்றலை செலுத்தி என்ன நடக்கிறது என அறிய முயற்சி செய்யும். அந்த வேகத்தை இரத்தம் நாளங்கள் தாங்க முடியாமல் வெடித்து விட வாய்ப்புண்டு.

உடனே அருந்த வேண்டுமென்றால் சிறிதளவு மிதமான வெந்நீர் அருந்தினால் உடல் சமநிலை அடையும். ஆபத்தில் இருந்து தப்பலாம். 

மண் பானை நீர் நம்மை எல்லா காலத்திலும் காக்கும்.

- அரசு சுகாதாரத் துறை.

தூத்துக்குடி மாவட்டம்_திருச்செந்தூர் வட்டார நூலகத்தில் உலக புத்தக தின விழா: 

கிளை நூலகம் வந்தவாசி நூலகத்திற்கு பழுதடைந்த மின் விசிறிகள் மற்றும் புதிய மின் குழல் விளக்குகள் வாங்கி பொறுத்தி தந்ததிற்கு வந்தவாசி  வட்டத் தமிழ்ச் சங்க தலைவர் திரு பீ.ரகமத்துல்லா அவர்களுக்கு நூலகத்துறை சார்பாக நன்றி தெரிவிக்கப்பட்டது.

28.04.2024 அன்று செங்கள்பட்டு மாவட்டம் செய்யூர் முழு நேர கிளை நூலகத்தில் மெய் நிகர் கருவியை மாணவர்கள் ஆர்வமுடன் பார்வையிட்டனர். 

 நூலகர்கள் தங்கள் நூலகங்களில் நடைபெறும் நிகழ்ச்சிகள் பற்றிய  செய்திகள்,  கவிதை, சிறுகதை, கட்டுரை, நகைச்சுவை, துணுக்கு செய்திகள் போன்ற படைப்புக்களையும் எழுதி அனுப்பலாம். 

மின்னஞ்சல்:  noolagarseithi@gmail.com

வாட்ஸ் ஆப் :  8668192839.

இந்த இதழ் பற்றிய தங்கள் கருத்துகளை கீழே உள்ள பெட்டியில் பதிவு செய்யுமாறு அன்புடன் கேட்டுக் கொள்கிறேன். நன்றி வணக்கம்.